暖笠笠兩餸一湯晚餐 2013-11-28

依兩日氣溫驟降

尋日仲又濕又凍

唔想出街食飯

喺屋企煮個簡單兩餸一湯晚餐都好正

木瓜日月魚豬軟骨煲雞腳（附食譜）

喺隔離區嘅傳統市場

比我見到啲雞唔錯

突然想飲啖湯

拿拿聲買咗一斤返嚟煲。

1）雞腳洗淨剪去腳甲、豬軟骨出水待用

2）日月魚泡水一會、木瓜去皮去籽切塊

3）煲滾水放入所有材料加果皮再煲至大滾

4）轉小火煲兩小時，落鹽調味即成

梅菜酸筍湯(附食譜)

之前去食阿川鵝肉是必點,佢地用鵝去餚成湯,再加埋梅菜酸筍去煲,真係好好飲好鬼正

兩個星期前老公公司攪咗個BB焦,果日除咗燒野食之外,仲有人煲埋湯比我地飲,其中一個就係梅菜酸筍湯!!個湯攪到我成日心絲絲想煲

今朝問老公想飲雞湯定想食咖哩雞,佢話雞湯喎...本來唸住去買餸順便去買玉竹返黎煲雞架,點知去到買菜時見到好多C9買酸筍(筒筍),我即刻改變主意,一於老翻個梅菜酸筍湯...

經過處理既筒筍,可以用黎炒或煲湯

1. 雞件洗淨(食譜通常用鵝或鴨,但我屋企冇,用雞代替)和梅菜沖去鹽份, 一起汆水,梅菜撈起切段待用

2. 酸筍涼洗切段再對切

3. 煲滾一煲水將1)和2)的材料 . 薑數片和蔥段(我唔記得落,最後先加入去)同落,至水大滾轉小火煲約2小時,加少許鹽調味即成

山藥當歸豬骨湯(附食譜)

山藥都係62阿哥比既,

62叫我留返個頭比佢,

佢要攞黎種喎,成唔成功未知

不過我煲依個湯就好好飲

蕃茄薯仔碎肉湯 (附食譜)

依排沉迷喺FB同班豬朋狗友八八啩啩加上開始大掃除,冷落哂個blog,唔得嘞,要耐唔屎keep住update先得嘞

好耐冇煲蕃茄薯仔湯嘞,咁岩62阿哥比咗大袋我地,咁就打鐵趁熱去買埋薯仔煲黎飲啦,好飲!

人參當歸烏雞湯(附食譜)

好耐冇煲湯嘞,平時都係滾湯多...今次煲依個人參雞湯係以台灣方法去煲,我同老公都好鐘意飲,台灣人結婚喜慶都會有依個湯

蘿蔔貢丸湯(附食譜)

我好鐘意食丸,幾乎所有丸我都唔會放過...而台灣人好鬼鐘意用乜丸物丸滾湯,依個蘿蔔貢丸更係我去食古早味魯肉飯時必點既湯,但係次次飲都到喉唔到肺,貢丸得兩粒,真係唔夠我食囉,所以自己買貢丸返黎煲,太正嘞,依餐冇食飯,齋飲兩大碗多貢丸湯,滿足到呢

其實貢丸喺台灣同香港唔同,香港叫既所謂貢丸,係有冬菇既,所以台灣會強調香菇貢丸,依邊既貢丸係齋肉冇冬菇,依個湯用舶菇貢丸都好好似

小魚乾鳳梨煲苦瓜湯(附食譜)

屋企日日都要飲湯,但我個人好鬼懶,好少燉湯飲,平時多數都係滾湯!!

苦瓜湯係老公至愛,所以一個禮物至少煲兩次苦瓜湯,順便清清熱氣...雖然係滾湯,不過加埋菠蘿啖湯都好甘甜架

魚翅蟹肉羹(附食譜)

今餐真係豪嘞,除左有豉椒炒蟶子(食譜click here) 仲有試煮左個魚翅羹!!

之前返香港買左一包魚翅仔,但係到依家都未開封,因為唔知點整(唔識整又要買,真係傻既)

最近上網搵下有d咩食譜岩用,天氣咁熱唔想燉雞!!最後搵到台灣人辦傳統宴會必食既魚翅羹,就咁一於試下整,出黎都好好味,同出面比緊係我既真材實料啦,魚翅大隻過出面食既

鹹酸菜豬肚湯

天氣見凍凍地,就買左兩個豬肚返黎煲左煲鹹酸菜豬肚湯,豬肚煲到腍哂好好食...正

豬肚用生粉同啤酒洗去潺,放落水中灼熟及去雜質,再切塊備用

鹹酸菜用水浸半小時至酸菜變淡,切塊備用

將豬肚 . 鹹酸菜 . 薑絲和1-2杯米酒落入已準備的滾水中,待再大滾後轉小火煲2-3小時至豬肚腍後

加入蜆轉大火至再滾,落鹽調味即成

蛤蜊(蜆)湯

冇錯...又係蜆,屋企實多蜆喇,要再食咁d,所以滾個岩哂我依個懶人又快捷好飲蜆湯啦

因為之前d九層塔俾我老爺移走左,原來佢種左入盆入面,今日去摘既時候點知....

九層塔變到又老又乾,但都要摘架,我冇埋其他野煲湯,都係要佢陣味姐,就咁揀左d成盆野較為好少少但超唔靚既黎用

水煲滾落薑絲(唔記得買嫩薑,用老薑代替)和蜆

加少許酒,待蜆開心後加入香油/麻油 . 九層塔滾1分鐘

落鹽調味即成

淮山杞子鮑魚煲雞

          

自從黎左台灣之後,我好少機會飲到媽咪煲既老火靚湯,我係一個好鐘意飲湯既人,以前o係英國我都會帶好多煲湯料過去自己煲,但係係台灣真係好少搵到我想要既料,黎黎去去都係個d咩麻油雞呀燒酒雞呀四神湯呀咁,我一d興趣都冇,同埋飲台灣補湯容乜易飲到我流鼻血架!突然有一日行開supermarket,見到鮑魚減價(梗係冇o係香港媽咪買既鮑魚大隻同好啦,我d係細雞野黎架咋)於是我就買返黎煲雞囉,我就走去藥材舖睇下有咩煲湯料買囉,我一問之下有好鬼多都係冇架,例如陳皮&無花果,係依邊根本就搵唔到,不過好彩俾我搵到一d,好似淮山.党參.慈實等等,不過台灣同香港叫法又有d唔同,個日老闆都俾我問到out晒頭

仲有62有養雞,冇錯,佢好enjoy養雞呀種瓜呀咁,因為佢養太多喇,我地梗係冇辦法日日食啦,所以d雞由過年前養到而家,由雞仔養到變老雞,再唔劏遲早變雞秘祖架喇!今朝心血來潮就攞d鮑魚仔出黎煲湯啦,同埋今日係台灣既父親節,就煲煲湯黎孝敬62個老人家囉...味道唔錯,當然冇得同媽咪既愛心靚湯比啦,不過好過冇囉煲好之後我即飲左兩碗