限量驚喜

又有禮物收嘞今次係阿四由香港寄黎既包裹

一睇封面容物寫住書,我心唸書台灣大把,有咩書要喺香港寄比我而且仲係唔重既書

即刻拆開睇下係咩啦~~~一打開,我對眼即時發哂光,係出前一丁出既特別版"黑蒜油豬骨湯味"公仔麵,仲有一包我搵好耐都搵唔到既韓式昆布絲

隻麵一出我見阿四同埋其他香港朋友講話好好食,我果時已經好想試下嘞!!不過隻麵賣咗一段好短時間就比人掃哂,而家市面再搵唔到嘞!!
估唔到今次阿四寄比我地齊齊分享,令我地雖然唔喺香港都食到限量好野我琴日已經食咗一包,哇~真係好正呀,黑蒜油真係好香好好食

我依個長氣衰鬼又要喺度多謝妳Shirley,寄咁正既野比我地享受

躲於衣櫃裡的禮物

如題: 這禮物據聞置身於衣櫃裡有半年時間,好彩依半年佢都冇出味啫

上星期收到英國blog友阿V從英國寄黎既禮物~~一如以往係62收包裹!!62攞包裹比我時即刻撇清邊邊位唔係佢界開既,我知我知

今次海關竟然開箱睇包裹!!之前先同朋友講開關於郵寄包裹黎台灣問題,我收過咁多次只係比人開過箱兩次(計埋今次)朋友話佢次次寄次次開箱~~

不過今次海關只係界開邊邊位,同埋界開咁冇睇入面,咁佢界黎做乜?好彩佢地冇拆開攞d野出黎咋...唔講咁多,去相睇好野

禮物仍然好鬼豐富,仍然有食又有靚靚身外物
食品類 ~ 重慶火鍋酸辣粉絲,據說依碗味道有6成香港味,我未食過香港既,有機會試到相似既我已經好開心,搵日開黎食

仲有好正既Nando's醃雞粉,今次阿V仲醒多我一樣Peri Peri sauce,讓久違Nando's既我重新Hot起來

餓姦力麵包改良劑 ~ 有咗佢以後整包就唔駛再用蛋糕乳化劑嘞

南乳 ~ 正!!終於喺台灣有南乳存貨嘞,以後煮南乳餸唔駛就住就住

仲有車厘子,比我做椰撻同蛋糕,正

靚靚身外物有佢地:

我既專屬T,有我個cute版o麥頭,全世界只此一件,大愛(特別多謝Mr.T百忙中幫我設計)

仲有bling bling靚靚筆,好華麗呀好閃呀,好鐘意

V,最後長氣又CUM氣都要講多謝架嘞你地咁忙都要寄好野比我真係有d唔好意思!!以上全部我都好鐘意呀~我都係時候要搜羅台灣好野還人情嘞

蚵嗲(蚵仔炸)-附食譜

尋日鄰居喺佢娘家攞咗d海產返黎比我地,

佢d蚵仔好大隻好鬼靚

因之前同老公去海邊食蚵嗲

一食就愛上咗

一於老翻

上網搵材料,有人加豬肉

但我唔想加其他野

只係想食返原味

但最後炸出黎略嫌粉厚咗少少,外皮唔夠鬆脆

但老公話內餡就好鬼正

第一次都算成功既

蚵仔洗淨瀝乾水份 . 韮菜洗淨瀝乾切0.5cm幼粒備用

粉漿材料: 在來米粉(粘米粉)200g . 中筋麵粉100g . 水 300ml . 生油1 1/2湯匙 . (鹽 . 糖 . 胡椒粉各少許), 將所有材料拌勻成粉漿備用

1. 在橢圓大湯杓上掃上一層油,加入少許粉漿

2. 灑上一層韮菜粒,加入蚵仔數隻,再灑一層韮菜粒

3. 在面層再加入粉漿

4. 放入180C熱油中炸至開始定型,再用另一隻湯杓多其取下,將蚵嗲炸至表面金黃即可

食時佐醬油膏/甜辣醬

梅菜酸筍湯(附食譜)

之前去食阿川鵝肉是必點,佢地用鵝去餚成湯,再加埋梅菜酸筍去煲,真係好好飲好鬼正

兩個星期前老公公司攪咗個BB焦,果日除咗燒野食之外,仲有人煲埋湯比我地飲,其中一個就係梅菜酸筍湯!!個湯攪到我成日心絲絲想煲

今朝問老公想飲雞湯定想食咖哩雞,佢話雞湯喎...本來唸住去買餸順便去買玉竹返黎煲雞架,點知去到買菜時見到好多C9買酸筍(筒筍),我即刻改變主意,一於老翻個梅菜酸筍湯...

經過處理既筒筍,可以用黎炒或煲湯

1. 雞件洗淨(食譜通常用鵝或鴨,但我屋企冇,用雞代替)和梅菜沖去鹽份, 一起汆水,梅菜撈起切段待用

2. 酸筍涼洗切段再對切

3. 煲滾一煲水將1)和2)的材料 . 薑數片和蔥段(我唔記得落,最後先加入去)同落,至水大滾轉小火煲約2小時,加少許鹽調味即成

我的第一個Cast Iron by Le Creuset

早排老公睇報紙突然問我 : 妳不是一直很想買這個超重的鍋嗎?(冇錯~佢既字典只知道LC係一個重煲,其他一概唔知)

我果刻知佢肯比我買,緊係即刻用好想要既表情同佢講 : 是呀~你要送我呀?

就係咁佢終於送我第一個Cast Iron...

之前行百貨公司LC專櫃睇過下,我屬意係24cm round casserole,但佢地既顏色唔多,我就上LC既website睇,Teal係我+老公都鐘意既顏色,望落好舒服,因為新光唔見有Teal,最終就上網搵代購,價錢仲平百貨公司好多,即刻訂咗佢返黎...

我仲未開光呀,好心急想快d用佢

菠蘿包+迷你火腿芝士沙律包(湯種)

話說之前喺FB又見到網友阿V整菠蘿包,早喺佢整之前我已經入去睇咗食譜,唸住整架嘞!!

但係礙於臭粉同奶粉攪到我遲遲都未動手後來V話唔駛臭粉都整到,我又開始心動,即刻去買奶粉啦....哇~全部都咁屎大罐既,點攪

最後比我唸到去鄰居度攞d BB奶粉,咁又唔駛買大大罐返黎用唔哂蹝咗佢啦

解決咗奶粉問題之後,以為可以好得心應手咁搓包啦,唉....點知第一次整大失敗問題可能出喺蛋糕改良劑度,我搓d粉發酵唔起,攪到要全部揼鬼哂~~~