死Y!Blog

好慶呀!!!!...我打既依篇野Y!Blog save唔到,突然去左唔知邊Q度!!真係打唔Q返我d內容,同埋我唔想再打!!!激死我

等我條氣順返先去補篇過年blog啦

過年去左邊

過年期間因為老公工作關係,由初二開始我地就實行邊工作邊娛樂

我地去左集集火車站(細姨奶奶就係住係附近,)果度又係一個旅遊景點,當日真係好多人,本來諗住將車停係姨奶奶屋企,我地就行過去火車站果邊,但佢地好似出左去玩,我地只好自己搵地方停車啦~

依個餐廳就建係火車路軌前,不過我地冇去食野,因為我地要食對面既小食街

火車站隔離有個公司,因為過年關係,有辦活動,是次為紙雕公仔~~所有作品都係小學生做,係唔係呀

肯定老師先係大功臣啦

係食街有好多好野食,依個用竹筒煮既湯,但係我唔見佢地煮,只係見到佢地係隔離個"不"d湯落個竹筒度,俾人一d假象

新竹米粉好有名(其實市面賣既米粉種類,求其攞一包都係新竹米粉,唔明點解我又要食佢)我地叫左炒米粉+粉麵+新竹貢丸湯...台灣叫貢丸既唔同香港,台灣貢丸冇冬菇,香港食開果隻貢丸係台灣講明叫香菇貢丸,所以大家要叫就要講明喇!

依個叫咩炸熱狗,好多地方都有,不過幾好食

去集集之前,我地要去鹿港媽祖廟拜拜,入到媽祖廟拜5分鐘就要出返黎,鹿港更加多人,去到邊度都迫滿人,所以係咁易食左個蚵爹

同埋麵線糊就走人...

每逢過年,中南部都迫滿哂人,相反北部就會好冷清,其實過年我地都唔想出去,因為周圍都大塞車~~最可惡既就係政府規定私家車上高速公路,每架車必須要有3個乘客以上先可以上high way,如果唔夠3個人就要罰NT$3000,係咪傻架?如果人地屋企得兩個人就邊度都唔駛去啦,政府真係好Q白痴!!攪到好多人過年前都買定d假人擺係車入面,唔夠人數就攞個假人"登"夠腳,真係大吉利是囉~~~

新年煮d乜

新年差唔多過完喇,我在此同大家拜個年先,祝大家虎年發大財,事事如意,心想事成,合家平安,身體健康

適逢今年過年寒流襲台,攪到成個人都懶洋洋,影左好多相又唔想整,好唔想郁呀!!但係今日老公開始要返工,而休息已久既垃圾車終於出黎收垃圾,我再懶都係時候要update下blog嘞

每逢過年我都特別忙,除左大掃除,仲要準備過年食品,上至拜神既三生,下至全屋人食既三餐我都係一個人煮哂,所以盡量以簡單為主

電飯煲仔飯

之前因為我d心愛臘/膶腸被退運之後,我想食佢地既癮更加嚴重,其實台灣大型超市係有得賣既,之但係驚大陸製,老公一直都唔俾我買,話驚有問題,所以一直冇買

上兩個禮拜,鄰居個歐巴桑打電話黎叫我過去佢屋企,話介紹個人俾我識喎,過到去原來係個香港人,突然見到同香(鄉),即刻同佢講我d腸啦,跟住佢話返去台中幫我搵下邊度有得賣喎

前日鄰居阿尖(嬸)攞左兩孖過黎話叫我試下,好食個同鄉再幫我買喎,見到真係開心得我呀

趁琴日老公weekend同埋大掃除

所以盡量簡單整個煲仔飯食算啦(其實係我一心想食)但屋企冇大瓦煲,又冇生鐵煲,唯有用電飯煲黎個電飯煲仔飯啦

用哂兩孖臘膶腸,加埋肉片同冬菇(屋企既雞要留到過年先劏,所以冇得食,唯有改用肉片)

老公同老爺第一次食煲仔飯,佢地既反應係...天呀!真係勁正呀

成煲飯一餐清哂,仲有隔離阿尖(嬸)試一啖即刻問我攞食譜,唔係你以為美食天氣做假架?!單係一個飯就攪到佢地凍未條啦

 

我睇個臘腸紙袋,果間野原來係我以前日日經過專賣香腸既鋪,但我一直都唔知佢地都有賣臘腸,早知就唔駛攪到咁麻煩啦

佢係台灣有名既店鋪,係本土生產,台灣有好多間分店,老公即刻話俾我買臘膶腸喎,話過年佢朋友黎要我整黎招呼客人喎~~~仲話下晝即刻去買,真係皇帝唔急太監急

鹿港遊

去鹿港係兩個星期前既事嘞,因為上個禮拜見工,同埋又懶冇upload相,所以到而家先寫依篇blog

鹿港既媽祖廟好出名,一到假期就會有好多遊客去拜拜同行街,因為我地都覺得靈,所以我同老公一有時間就會去鹿港既媽祖廟拜媽祖許願同還願

台灣所有地方一有比較大既廟,廟出面一定會有一條食街,所以鹿港都唔例外~~我地果日去拜完即刻搵小食啦

實在太多選擇,攪到冇食到鹿港最出名既蚵仔煎添

見工Part II

琴日係我去見第二份工,果間係台灣有d出名,公司有上市,員工福利都唔錯,除左有一般應有既福利(勞健保)外,有分工獎金,仲有就係有派股,因為條件好,所以設定既門檻比較高,我其實係冇咩信心可以入到去,只係去試試~~~

星期日老爺有個朋友黎我地屋企,老爺同佢講開我星期一要去見屋企附近既某某公司,老爺朋友即刻話佢地一直有同果間公司有合作(有概十幾年),叫老爺俾我個名佢,佢打去同公司講聲,話我去interview(攪到咁大陣將,我有d壓力喎)不過係個uncle既心意,我都接受~~~

之後個uncle星期日果晚打黎話晏晝打去俾個ex人事部經理,夜晚又同副總經理講,咁樣攪到我壓力越黎越大,不過我知公司又唔會因為你識得邊個邊個就可以入去做既,完全睇你條件符唔符合囉!!

琴日我揸車去,因為唔清楚路程有幾遠,人事約我3pm,我就提早2:30pm出發,加上燈位我諗大概20分鐘,點知早後唔計紅綠粒,車程完全唔駛5分鐘,真係近到呢!

我預料面試20分鐘攪掂啦,最後足足面試左1個鐘,只係得我一個去interview,又唔駛考試,只係講野講左個幾鐘,個主管話琴日只係初試,如果通過仲有複試~~~不過我唔驚,因為整個過程落黎我覺得佢地用我既機會唔大,所以如無意外我係冇機會去第二次!!!

最後兩個interview都完成喇,根住就可以暫停,過完年再搵過,其實我面試最大目的就係為左老公,佢話要有多d面試經驗,成唔成功係其次,可以藉由面試黎訓練自己唔駛緊張,攪到我而家既工作好似就係去面試咁!!Anyway...跟住落黎就係好好準備我既新年節目嘞,其他野我唔再理~~~