泡菜鍋

上個禮拜用自製泡菜整左煲泡菜鍋,老公食到lam lam脷,佢依幾日成日叫我再整,所以琴日出去買左d火鍋豬肉片返黎再黎一次泡菜鍋,等老公再過癮下

先用豬骨煲一煲豬骨湯底,再加みそ(味噌/麵豉醬)

將豬骨撈起,湯底加入泡菜待再滾

再加入火鍋豬肉 . 豆腐 . 小唐菜 . 餃子 . 冬粉等(材料因應喜好加入)

最後可打一隻蛋(屋企雞蛋用哂冇落到)

試味若唔夠鹹可加鹽調味即成

花田

琴日同老公去二林遊車河返黎途中發現,原來我屋企附近既田已經變成花田...個view真係靚到呢

超級偶像Vs超級星光大道

台灣依幾年都好似外國咁,出左好多歌唱節目,俾好多唱得之人有機會做歌星出唱片...最表表者就真係要數"第一屆超級星光大道"冇錯,就只係第一屆,當年既楊宗煒 . 林宥嘉同埋蕭敬騰既唱功真係驚人,而家星光幫已經到左第6屆,真係一屆不如一屆,我而家真係完全冇眼睇

反而台視既超級偶像真係一屆比一屆高水準,我有上一屆睇,真係俾我會係期待星期六快d黎,我又可以睇Super Idol(超級偶像)

主持...陶子(星光幫) Vs 利菁(Super Idol)

我越黎越覺得陶子好煩,依個係歌唱比賽,佢只係一個主持,身為一個主持下下串評審,成日叫人唔駛理小肥(主評審)既評語,我知佢係想做效果,但係冇必要集集都玩串嘴架嘛,又好鬼鐘意自己加意見,話邊個唱得好邊個唱得唔好,咁樣仲駛乜評審姐,佢做哂咪等囉,真係頂佢唔順

利菁就唔同喇,佢係台灣唯一一個變性藝人(仲係賺錢主持人前5名)佢好識得做返個主持既本分,佢唔會評論參賽者,更加唔會係評審發言既時候串評判,佢好識得分串,咩應該做同咩唔做得佢都handle得好好...

評分~星光幫既評分方式好假,佢地好主觀,成日有做馬既感覺,佢地由最高20個燈(20分)變成而家25個燈已經夠啦,仲要攪到話如果評判如果覺得參賽者唱得高過25分既話,可以舉手再企起身加分,夠喇...做效果做成咁

Super Idol既評分一直都比較公平,同埋佢地唔會話幾個評判夾埋,鐘意邊個就全投哂,佢地既意見都好客觀...

仲有好鬼鐘意Super Idol主評審---黃國倫,佢係因為上左"康熙來了"而被認識沖出幕前,大家先知道佢以前既背景真係大有來頭,佢就係作"我願意"俾王菲唱既製作人,仲有范曉萱既"眼淚"等等...佢作既都係大賣歌曲再加埋佢既攪笑效果,真係好好笑



以下就被形容為男辦Susan既Super Idol 4參賽者,佢初選一出街,即刻成為youtube點閱次數最高既參賽者,唔知係咪真係醜樣先唱得好歌既呢??不過真係好聽到呀

自由睇阿凡達Avatar

Avatar未上映我已經講明要去睇,本來諗住星期一晚去睇,點知陳雲林黎左台中,仲要住裕元,因為都係係中港路上,攪到星期一成日都封鎖成條中港路,真係俾佢攪死

佢唔走唔通我地唔駛去台中咩,最後琴晚去睇,好彩中港路冇在封(因為陳雲林被抗議人士攪到變左宅男,唔敢出酒店)

老公問我想去新光三越睇定去Tiger City,我諗都唔諗就去Tiger City,因為之前係新光影城有個唔好既回憶

唔知係咪好耐冇睇戲,而家戲院可以帶出面既飲品零食,好大原因係上個月有對藝人夫婦睇戲買出面既野入去,被蘋果影到之後訪問左個律師,原來先知道戲院規定睇戲既人只可能帶戲院既飲品和食物,如果唔依照規定就係違法

點知律師話台灣根本都冇咁既法例,變相戲院業者禁止市民帶外食入戲院先觸犯法例,只係我地唔識法律既人懵盛盛乜都唔知,次次都要偷偷帶野入去...

可能就係單新聞一出,而家個個去睇戲既人都光明正大咁攞飲品入場

去買飛既時候,佢有分2D同3D,我同老公梗係要睇3D啦,不過3D貴過2D好多,之前睇戲用Citibank credit card有discount,點知售票話話only Avatar冇做credit card discount,仲要加多$10新台幣,寫明話係電影公司規定,所以平時$210就可以睇,Avatar就要$320...

我心諗係咪真係咁巴閉呀,貴咁多又要爆哂棚,睇左之後真係覺得值回票價,所以籌備左十幾年真係抵佢咁串既...

真係好好睇呀

豬肉捲餅

上次再一次食牛/豬肉捲餅之後,老公一直對佢念念不忘,成日想再食...咁岩見blog友T&P有食譜,就一於買材料返黎自己整,出黎味道同上次食既差唔多

餅皮做法: 中筋麵粉加入滾水攪勻,再加凍水和油少許將麵粉搓成糰,用保鮮紙包好靜置半小時

取小塊糰麵擀成薄餅

燒熱鑊將薄餅略煎備用

在薄餅皮塗上甜麵醬,加上豬肉餡(我用左之前滷好既日本叉燒)和蔥後捲起,切件即成

叉燒拉麵 チャーシューラーメン

拉麵我唔係用日式拉麵,因為我依邊冇日式超市,"御毛屋"要台中先有,所以我係普通超市買左依隻叫意麵既麵,因為有d似,就一於試下得唔得,口感都幾近似,老公好鐘意食

湯底係我用豬骨餚既,因為時間唔係好長,所以d湯仲未變白,不過味道都好濃,下次會餚耐d~~

老公猛話叉燒入口即溶喎(太誇張)我嫌滷蛋滷得唔夠耐,顏色太淺,最後一包麵食哂

日式叉燒 チャーシュ

上次整日式叉燒係舊年既事喇,一直想食但又懶得整,今次想再整係想試下自己親自做豬肉捲,做日式叉燒最岩喇,又可以煮叉燒拉麵

鹹酸菜豬肚湯

天氣見凍凍地,就買左兩個豬肚返黎煲左煲鹹酸菜豬肚湯,豬肚煲到腍哂好好食...正

豬肚用生粉同啤酒洗去潺,放落水中灼熟及去雜質,再切塊備用

鹹酸菜用水浸半小時至酸菜變淡,切塊備用

將豬肚 . 鹹酸菜 . 薑絲和1-2杯米酒落入已準備的滾水中,待再大滾後轉小火煲2-3小時至豬肚腍後

加入蜆轉大火至再滾,落鹽調味即成

浯江御麵館

騎完馬我地就去左后里隔離--->清水既浯江御麵館食晚餐,睇佢細細間,成日好鬼多客人幫趁,老公之前係清水做過,所以佢之前差唔多日日lunch都去食,今次係我第二次,真係好鬼好食

第一次騎馬就.....墜馬

琴日天氣好好,老公趁寒流仲未到就話帶我去台中縣后里馬場騎馬,我見天氣有成30度,著boot熱實熱到我暈,所以就哂著左對普通既鞋...最主要原因係我唔認為未學過騎馬既人可以單獨馬住佢周圍走囉,同埋應該會有專人拉住隻馬慢慢走...點知去到先知我真係估錯哂

原來教練只係會企偽旁邊睇,其餘時間都係自己騎...

初時騎既時候都好好,因為佢都好乖咁行幾個圈,之前一到教練既位置佢就會跑(因為佢偷懶教練就佢用皮鞭嚇鬼佢)

再黎魯肉(心機篇)

之前整既魯肉所用既肉係我買現成碎肉黎既,所以唔係出面食開既魯肉,上次果種其實係台灣黎講叫肉燥,所以今次唔再偷懶,整返煲真正既魯肉食下先,果然口感唔同哂

韓國辣蘿蔔

之前整韓國泡菜用剩左半條白蘿蔔,煲湯or炒都唔知夠邊個食,又唔想為左依半條走去買多條返黎,見我d泡菜整得好成功(差唔多食哂咁濟),屋企d料又齊哂,就整個辣蘿蔔黎試下

蛤蜊(蜆)湯

冇錯...又係蜆,屋企實多蜆喇,要再食咁d,所以滾個岩哂我依個懶人又快捷好飲蜆湯啦

因為之前d九層塔俾我老爺移走左,原來佢種左入盆入面,今日去摘既時候點知....

九層塔變到又老又乾,但都要摘架,我冇埋其他野煲湯,都係要佢陣味姐,就咁揀左d成盆野較為好少少但超唔靚既黎用

水煲滾落薑絲(唔記得買嫩薑,用老薑代替)和蜆

加少許酒,待蜆開心後加入香油/麻油 . 九層塔滾1分鐘

落鹽調味即成

自家鹹湯圓

湯圓個個都食過,唔知大家有冇食過鹹湯圓呢

食個鹹湯圓我食左廿幾年,媽咪每年過年都必煮既應節食品,不過平時我想食都會叫媽咪煮黎食,上次去搵我媽咪時我叫佢煮,真係好好食!

炒蜆

鄰居個歐巴桑既娘家住海邊,成日都可以食到好靚既海鮮,前幾日佢又從娘家攞左好多靚蜆返黎,俾我我地一大袋

佢話加薑絲同九層塔煮湯就會好鮮甜好好飲,不過我老企棵九層塔俾我老爺移左唔知邊度,所以就用黎炒啦

第一個絲瓜炒蜆~~因為屋企有種絲瓜,一直覺得兩個係絕配,煮出黎非常鮮甜

做法:

燒熱鑊爆香薑絲和蒜茸,落絲瓜炒勻,加少許水(水不要加太多,因絲襪會出水)

再落蜆和絲瓜加蓋滾5分鐘至熟,加入鹽調味即成

再黎一個就係豉椒炒蜆~~因為老爺唔食辣,所以冇加辣椒(其實佢唔係好好蜆,早知就加埋辣椒去炒啦)個汁超好送飯

做法:

蜆先用滾水略灼至開口搾起備用

燒熱油鑊爆香蒜蓉和豆豉.落蜆略炒

倒入汁料(蠔油 . 豉油 . 糖 . 紹酒 . 香油/麻油 . 生粉和水)炒勻至杰身即成