椰汁砵仔糕

我一直對香港民間小食砵仔糕情有獨鐘,特別以前一到冬天,火車站就會有個賣砵仔糕既阿伯擔住兩大蘿喺度做生意,我一定會幫襯佢買幾隻,好好味架

早排見通少有出砵仔糕食譜,我已經好鬼想整,但係我依邊簡直係百無,搵果樣冇果樣!!就係因為澄粉同馬蹄粉都攪到我發癲

我以為發現依邊有間烘焙材料行就乜都掂啦...好明顯依間野都係唔pro!!!事原我想買澄粉同馬蹄粉,我問老闆有冇馬蹄粉,佢即時話有,佢攞俾我一睇

C囉...果包野大大隻字寫住馬蹄粉(澄粉),點解個攪埋一齊!!我問老闆兩樣粉好似唔同架喎,個C人老闆仲自認好醒咁同我講馬蹄粉即係澄粉!!!佢話唔明點解我話係兩樣野,又話我喺邊聽返黎唔同!!!

最後砵仔糕就唔可以跟通少既食譜整,但俾我上網搵原來好多粉都整到,最後我就搵到個食譜加椰漿,好似好正,今日即刻黎十二隻雙色砵仔糕,好好味呀

又食到一樣香港小食嘞

因為我依邊冇片糖,我就買左包紅糖代替,顏色好鬼深,攪到睇唔到底部既紅豆,不過蒸出黎都好成功...我話明要懷緬架嘛,食既時候緊係要叉住兩枝竹簽啦

材料(大約6個)

粘米粉 65g (我用在來米粉). 木薯粉 50g . 白沙糖/片糖 95g . 水 200ml . 椰漿200ml . 紅豆適量

做法:

1. 煮熟紅豆隔水備用

2. 將150ml水加糖煮溶放涼備用

3. 將粘米粉和木薯粉過篩,加入已涼糖水攪拌至沒有粉粒的糖粉漿

4. 將剩下50ml水和椰漿煮滾,熄火待1-2分鐘,再將椰漿水倒入糖粉漿中拌勻

5. 將4)之粉漿倒入小碗中大火蒸2分鐘後再加入紅豆(此做法可防止所有紅豆浸底),然後大火蒸8-10分鐘至糕熟(可用竹簽篤入糕中,如沒有炒沾在竹簽上代表熟透),取出待涼用竹簽叉起即可