脆皮燒肉(附食譜)

交功課嘞

見到T&P都出左好多篇教燒肉食譜,一直想整,但係一直懶鬼上身,又冇整到,終於上星期去街市買返舊腩肉返黎整囉~~


題外話...

因為禮拜同禮拜去去左台南兩日同老公慶祝佢生日(其實係冇慶祝,只係去relax下)同埋順便去睇中醫~~~睇左之後個中醫話我要戒口,所有辣 . 煎 . 炸 . 烤 . 燻既烹調食物唔食得,麵粉類(麵包 . 麵條) . 魚 . 西式 . 牛奶(所有高蛋白)唔食得...咁樣我究可以食d乜

只可以食米飯類,早餐可以食任何米食,不能食太飽

加上要多做運動,因為我免疫力問題,要改善...由琴日開始,每日同老公朝早6點起身去散步45分鐘以上(我只可以散步,咪叫我跑...)

冇理由買左d肉返黎唔整架,諗住整黎俾老公同62食,自己就齋食菜同飯算嘞...之但係我聽佢講係一回事,以我依個咁為食既人,真係忍唔到口呀...最後琴日焗左叉燒,一出爐我就食左幾舊,今日既燒肉,又係食左先!!唉...請原諒我偶然一餐半餐(只係我依個偶然提早左姐)

入正題,第一次照住T&P教既方法整,真係大成功呀,做法簡單...礙於我依邊搵唔到南乳,就用較接近既"紅粷豆腐乳"整,出黎都好好味...只係個皮略為鹹左少少,可能我抹唔哂d鹽,同埋醃太耐(我醃左差唔多24小時),下次依度一定要注意

1. 腩肉先用南乳 . 紹酒 . 少許鹽醃勻全身

2. 在豬皮上鋪滿一層鹽,放入雪櫃醃5個鐘以上

3. 取出已醃好腩肉,刮走豬皮上的鹽,再用廚房紙抹走剩餘的鹽分

4. 在豬皮上滴數滴油捽勻

5. 放入焗爐上格以上火220C焗10-15分鐘至豬皮表面呈麻皮(每個焗爐型號不同,焗時須注意不可過焦,最好留意住烤焗過程)

6. 再將腩肉放到中格轉180C上.下火(我的焗爐是全火)焗1小時至熟

7. 取出代涼斬件即成