大甲媽祖遶境2010

一年一度世界級的三大宗教盛事既大甲媽祖遶境又開始嘞,信眾喺4月16日晚11點開始由起點地台中大甲,為期9日既遶境進香活動,目的地係嘉義新港既媽祖廟!!!往年媽祖遶境只有8日,因為今年參加既信眾人數激增(大約70萬),所以今年安排多1日俾信眾一睹媽祖既風采,感念媽祖的庇祐...

沿途進香信眾會到不同既媽祖廟住宿及休息,琴晚進香團已進入我地依邊,但會喺回程時(下星期四)先會入住我依邊(北斗)既媽祖廟...

今朝開始已有好多人準備拜祭物品(我冇準備,因為我唔識,所以有心就夠)我屋企出面馬路係遶境路線,鄰居個個好早就準備迎接媽祖,中午我同老公又去湊熱鬧,鄰居見到我地踩單車到即叫我地一齊等,等咩呢???

 等躦媽祖既轎底(依個係民間習俗,鑽媽祖轎底寓意得到媽祖既庇佑)我本想叫老公負責鑽,我就拍低,到最後我都去鑽埋一份,誠心許願

所以最後都拍唔到鑽轎底既情況,等媽祖回程再睇下拍唔拍到先

我黎左台灣4年幾,都未試過好似今日咁,特別係能夠順利鑽到媽祖轎底,感覺好好...雖然我冇特別既宗教信仰,個人都幾鐘意依種民間活動,其實依類型活動一直能夠流傳落黎真係唔容易,而且參與既人更有年輕既吹勢,可以反映台灣真係非常自由(依點值得讚)...如果俾著大陸,可能一早俾佢地冠以一個邪教既名字...希望台灣可以一直自由民主落去!!!