二人世界晚餐

搬咗黎台中已經3個禮拜啦,因為有好多廚房野都未買齊,攪到我成個人懶咗,加上屋企附近好多食市,行出少少更係異國餐廳所在地,想食咩都好方便!
不過呢總唔可以日日食出面嘛!所以喺搬屋後第二個禮拜我就開始煮飯!喺有限既資源下煮d簡單既二人世界晚餐!同樣食得開心又滿足架

2011-10-14
是晚為新居第一餐晚餐,有偷運回台臘腸,煎草魚同燙生菜~當晚煎魚時先醒起未買油最後用橄欖油代替,因怕太高溫,所以喺冇燒滾既情況下落魚去煎,最後攪到魚皮痴底(我最鐘意食果層皮架嘛,最後食唔到)不過都好味既~




2011-10-17
之前一晚我地食咗喺香港帶返黎既熱浪薯片之後,第二朝起身我喉嚨已經感覺到好唔對路嘞,當晚即刻煲返煲紅蘿蔔雪耳排骨湯潤返下~

2011-10-18
雞胸肉炒西芹,蒜蓉炒青菜,涼拌嫩豆腐
我喉嚨好唔舒服,攪到好似病病地咁,晏晝老公打電話返黎話佢感冒去睇醫生,咁就大問題嘞(我老公佢感冒除非好嚴重,唔係佢都唔會去睇醫生既)我相信係我傳染比佢~~
晚餐簡單快手煮咗3個清淡餸做晚餐!

2011-10-20
是晚是搬屋後最為豐盛的一餐,3餸1湯~~豉油雞翼,煎魚,燙生菜,金銀菜煲日月魚湯
d魚細細條我唔知叫咩魚,係老公至愛,每次佢有時間陪我買餸佢一定會叫我買依隻魚整比佢食!是晚清咗一條半,剩半條過我!好彩我有我愛既雞翼送飯啫!